Como pasar o mantemento de Excel a un GMAO
Por Daniel Serrano Armenta, electricista de mantemento industrial
Case todos os departamentos de mantemento comezan cunha folla de cálculo: unha lapela de máquinas, outra de preventivos con datas, outra de recambios. Funciona mentres o leva unha persoa. Esta guía explica cando paga a pena dar o salto a un GMAO, como preparar os datos que xa tes e como importalos en MantPro, un GMAO de balde e de código aberto, sen volver teclealos.
Sinais de que o Excel quedou curto
- Os preventivos pásanse porque ninguén abriu a folla ese día, e non hai nada que avise.
- Hai varias copias do ficheiro (a do xefe, a do obradoiro, a do correo) e ningunha está ao día.
- O técnico non o ten a man diante da máquina, así que anota en papel e alguén o pasa despois… ou non.
- Non sabes que se lle fixo a unha máquina o ano pasado, nin canto che custou.
- O stock non cadra: gástanse recambios que ninguén desconta.
- Unha auditoría pídeche o histórico e tardas días en sacalo.
Se te recoñeces en dous ou tres, o GMAO vaiche aforrar máis tempo do que custa o cambio.
Paso 1: decide que vas pasar
Non fai falta levar todo o primeiro día. Por orde de importancia:
- Máquinas: a base de todo o demais.
- Preventivos (tarefas periódicas): o que máis se nota dende o primeiro día.
- Usuarios: os técnicos aos que se asignan as tarefas.
- Recambios, se levas almacén.
- Pendentes abertos.
- Historial de traballos anteriores, se o tes e che interesa conservalo.
Paso 2: ordena a lista de máquinas
É o paso que máis traballo aforra despois.
- Un nome único e claro por máquina («Compresor 2 nave B», non «compresor»).
- Xerarquía: se un equipo vai dentro doutro (unha liña con varias máquinas), indica cal é a superior. En MantPro escríbese a superior ou a ruta completa, por exemplo «Liña 1 > Forno».
- Zona ou nave de cada unha.
- Código se xa os usades, e notas útiles («revisar o refractario cada 6 meses»).
- Quita os duplicados: dúas filas para a mesma máquina acaban en dous historiais distintos.
Paso 3: converte os preventivos en tarefas periódicas
No Excel adoitan estar como «revisión mensual» e unha data. Para o GMAO, cada tarefa necesita:
- Título concreto («Engraxado de rolamentos – Bomba 3»).
- Frecuencia (diaria, semanal, mensual, anual…).
- Data de inicio ou última vez que se fixo, para que a seguinte saia ben.
- Días de marxe: canto se pode atrasar antes de dala por atrasada.
- Técnico asignado ou especialidade, se a hai.
Os preventivos por horas de uso, ciclos ou quilómetros configúranse despois en MantPro, nos contadores de cada máquina. Máis en mantemento preventivo.
Paso 4: prepara o almacén
Para cada recambio: nome, código (se o hai), unidade, stock actual, stock mínimo e localización (zona, andel, balda e sección). En MantPro, as localizacións que non existan créanse soas ao importar e o stock inicial queda rexistrado como entrada de «Alta inicial». Máis en almacén de recambios.
Paso 5: importa en MantPro
- Descarga MantPro e instálao no PC da oficina ou do obradoiro.
- Entra como administrador e abre Ficheiro → Importar dende Excel/CSV…
- Preme Descargar modelo se queres partir dunha folla coas columnas xa preparadas, ou escolle directamente o teu propio Excel (.xlsx) ou un CSV.
- Escolle a folla e que contén (máquinas, artigos, avisos, usuarios, pendentes ou historial), ou importa todo o libro dunha vez.
- MantPro empareya as columnas só; revisa que cada unha vaia ao seu sitio.
- Escolle que facer co que xa existe: saltalo ou actualizalo cos datos do ficheiro.
- Mira a vista previa fila a fila: que é novo, que se actualiza, que se salta e que ten erros, co motivo.
- Preme Importar. Antes gárdase unha copia de seguranza automática, e se algo falla non se cambia nada.
As filas con erro pódense gardar nun ficheiro á parte para corrixilas e volvelas importar. Os usuarios importados reciben un contrasinal temporal que terán que cambiar ao entrar.
Paso 6: ponlo en marcha co equipo
- Imprime as etiquetas QR e pégaas nas máquinas.
- Instala a app nos móbiles dos técnicos co QR que amosa o PC; funciona sen conexión.
- Asigna os primeiros pendentes e deixa que os técnicos os pechen dende o móbil, con fotos.
- Deixa de actualizar o Excel dende o primeiro día: dous sistemas á vez acaban desincronizados. Garda o ficheiro antigo como arquivo.
Erros habituais ao pasar do Excel
- Datas como texto raro. Usa datas de Excel ou o formato DD/MM/AAAA ou AAAA-MM-DD.
- Ficheiros .xls antigos. Ábreos en Excel ou LibreOffice e gárdaos como .xlsx.
- Nomes repetidos de máquinas sen indicar a que liña pertencen.
- Querer pasar todo perfecto antes de comezar. É mellor importar máquinas e preventivos, comezar a traballar e completar o resto sobre a marcha.
Preguntas frecuentes
Podo importar o meu Excel tal como está?
Si, se ten unha fila de cabeceira e unha fila por rexistro. MantPro empareya as columnas automaticamente e podes corrixir o emparellamento antes de importar. Tamén podes usar o seu modelo descargable.
Que datos se poden importar en MantPro?
Máquinas, artigos do almacén, avisos recorrentes (preventivos), usuarios, pendentes e historial de traballos anteriores, dende Excel (.xlsx) ou CSV.
Que pasa se importo dúas veces o mesmo ficheiro?
Escolles que facer co que xa existe: saltalo ou actualizalo. No historial de traballos, o que xa está coa mesma data e título sáltase.
E se a importación sae mal?
Antes de importar gárdase unha copia de seguranza automática, e se hai un erro non se cambia nada. As filas con erro pódense gardar á parte para corrixilas.
Canto custa pasar a MantPro?
Nada. MantPro é de balde e de código aberto, sen límite de máquinas, tarefas nin usuarios.